Nú er að hefjast 15. ár sunnudagsganga ferðafélagsins. Sunnudagsgöngur hafa verið farnar á hverjum sunnudegi allan ársins hring síðan 2005 og því má reikna út að þær séu orðnar nokkuð yfir 700 talsins. Hjördís Hilmarsdóttir hóf þetta verkefni og hugsaði þetta sem góða leið til að hreyfa sig og um leið stuðla að góðri sunnudagssamveru. Hugmyndin sló í gegn og enn erum við að 15 árum síðar þó Hjördís hafi skilað keflinu til ferðanefndar ferðafélagsins árið 2018 eftir 13 ára umsjón. Í haust var ákveðið að fækka ferðum og eru þær í dag 1. og 3. sunnudag í hverjum mánuði. Þemað núna á fram á vor verða heimsóknir á eyðibýli sem er að finna á Héraði og svo tekur skipulögð sumardagskrá sunnudagsganga við þann 3. maí með gönguferð í Valtýshelli í Hjálpleysu. Ferðir ferðafélagsins eru auglýstar í Ferðaáætlun FÍ og á heimasíðu ferðafélagsins undir Ferðir.

Það eru ýmsir sem leggja hjarta sitt í störf ferðafélagsins og oft í sjálfboðavinnu. Hjördís Hilmarsdóttir er ein þeirra en hún hefur komið að störfum ferðafélagsins í fjölda ára. Það gleður okkur hjá ferðafélaginu mikið að Hjördís skyldi fá Þorrann í ár en sú viðurkenning er veitt aðila sem hefur með vinnu sinni gert samfélaginu gott og gagn, svo eftir er tekið. Hjördís fær Þorrann fyrir Perlur Fljótsdalshéraðs, Heiðarbýlin í göngufæri, Sunnudagsgöngur ferðafélagsins, myndina Heiðarbýlin í nærmynd og sleðahundana í samstarfi við Rauða Krossinn. Það má því segja að Ferðafélag Fljótsdalshéraðs eigi Hjördísi margt að þakka. Hún er uppspretta skemmtilegra hugmynda og hefur svo elju og drifkraft að koma hugmyndum í framkvæmd og fylgja þeim eftir. Innilega til hamingju Hjördís!